Thursday, May 15, 2014

මා මනස අතරමං කළ " මාගම් සෝලිය "



"කලා කෘතිය යනු සැබෑ ලොව අනුකරණය කරමින් කලාකරුවා විසින් නිර්මාණය කරන ලද කල්පිත ලොවකි "
කල්පනා ලෝකය
මහාචාර්ය එදිරිවීර සරත්චන්ද්‍ර

ආරම්භක පිටු අතරම මෙය දැමීමෙන් කියවන්නා එය දැකීමෙන් කර්තෘ කියන දේ ගැන තර්ක කිරීමට අවස්ථාවක් පාඨකයාට අහිමි කර ඇතැයි මං සිතමි. පන්සල කේන්ද්‍රීය සාධකය කරගනිමින් පවුලක් වටා ගෙතුන මොහාන් රාජ් මඩවලගේ මාගම් සෝලිය නැමති නව කතාව මා ප්‍රශුස්ථය කර ගනිමින් විවරණයක යෙදෙන්නට හදවතට එකඟ වෙමි.

1818 දී ඉංග්‍රීසින්ගෙන් රට බේරා ගැනීම අරඹයා ඌව වෙල්ලස්ස කැරැල්ල ඇරඹිණි. ලොව දරුණුම ත්‍රස්තවාදීන්ද පරාජය කළ අප ශ්‍රිලංකා හමුදාව අද මෙන්ම එදාද අති බිහිසුණු ලේ ඟගක් මැද බැස තිර සාර අදිටනින් විමුක්තිය සොයා සටන් කළහ. වැටෙමින්ද වැඩෙමින්ද දන දන තුඩ තුඩ රැව් දෙමින් ගමක් ගමක් පාසා ඇවිලෙමින් එය විකාශනය විය. ඕනෑම අයෙකුගේ අවධානය නිතැතින්ම ඇදී යන්නට සලස්වන ඉතිහාසයයෙහි ලොම් ඩැහැ ගැන්වෙන දෙයක්ද කතාව ආරම්භයට පෙර මුල් පිටු ගොන්නට එකතු කරන්නට මොහු දක්ෂය. එම දැකීම් දිගේ ගියද අවසන හදවතෙහි ඉතුරු වන්නේ මෙලොවදී මිහිපිටදී සිදුවිය හැකිදැයි යන සිද්දිදාමයක් කරපින්නාගත් ප්‍රශ්ණාර්ථ ගොන්නකි. කාගෙත් කියවිල්ලට මාද මටම කියා පොතක් ගෙන හති දම දමා කියවා අහවර කලෙමි. මා දෙලොවක අතරමං විමි. ඒ මෙවන් ලොවක මේ දේවල් වේදෝ යන මනෝ විකාරයයි.

පුංචි රාලගේ අනාදරයට නතු වු ගෝමරී නම් බිරිඳත් තම දියණිය හා පවුල් කන සැමියාත් ගිහියෙක් වුද නමුත් පැවිද්දෙකු සතු යුතුකම්ද කරන ගනින්නාන්සේ කෙනෙකුත්ද මැණිකා, පුංචා, ටිකිරි ආදී දරුවන් සමඟින්ම පොඩිනා, ආරච්චිල, සුරඹා, සොබනී යන වෙනත් චරිතද මෙයට ඈදාගෙන ඇත. විවිධ දේ අතින් ලොව නොහිතන දේ වෙද්දී තම දියණිය සමඟ පවුල් කන පියා යන චරිතයට පුදුමයක් නොවේ යැයි යමෙක් තර්ක කළ හැක. එහෙත් එය උලුප්පා පෙන්වන විදිහට අප්පිරියා හිතේ. 

අද ලිංගිකත්වය ගැන කතා කිරීම එතරම් දෙයක් නොව. එය මෙලොව සත්වයා බිහිවිම අරඹයා එදා සිට අදත් හෙටත් ලොව පවතින තුරුත් සිදුවන්නකි. නමුත් මෙකී ක්‍රියාව ගැන ලිවීම ප්‍රමාණය ඉක්මවා ගියා යැයි මට සිතේ. ඕනෑම දේක සීමාවක් තිබිය යුතුය. එහෙත් ජුගුස්සාජනක ලෙස එකම දේ විවිධ චරිත වටා පුන පුනා ඉලිප්පීම මත පාථකයාගේ මනස දිගේ ගලා එන්නේ ඔක්කාරයකි. වල්ලී සහ ආරච්චිගේ පුතා දේවාලය තුල හැසිරෙන අවස්ථාව ලියා ඇති ආකාරයත් තව ඕනැ තරම් උදාහරණත් කතාව පුරාම ඇත. 




සම්ප්‍රදායික පන්සල යන රමුවෙන් පිට පැන ගත් පන්සලක වින්‍යසය ගෙතන මෙහි ධ්‍යාන ලබා ගත් ලොකු හාමුදුරුවන් අනාගතය දකිමින් පල්ලේගම හාමුදුරුවන්ව ගමින් පිට කර සටන් සදහා වෙහෙස වන්නට යවයි. මෙය පිලිගන්නට හැකිය. මන්ද චිරාත් කාලයක් ගමත් පන්සලත් බද්ධ වෙමින් බුදු දහමත් සිංහල ජනයාත් රකිනු ලැබුවේ ගමේ විහාරස්ථානයේ හිමි නම විසිනි. මෙකී හිමි නමද තම යුතුකම් ඉටුකලා යැයි මට සිතේ. එමෙන්ම උන්වහන්සේ නිවුණු මිනිස් දහමින් පරිපූර්ණ චරිතයකි. ලොකු හිමි ගැන කතාව තුලදි කිසිම අකැමත්තක් ඇති නොවේ. උන්වහන්සේ විය යුතු දේ වෙන්නට ඉඩ හසර තනා දී ඇස් පියාගත්තා යැයි මට සිතේ. නමුත් එතැන් පටන් පන්සල බාරගන්නා සුදු බණ්ඩා එසේත් නොමැති නම් ඇබිත්ත උන්නාස්සේගේ ක්‍රියා කලාපය කෙසේවත් පිළිගන්නට බැරිය. එම චරිතය මවද්දි මෙකී කතුවරයා පැටලිලා ගියාදෝයි මට නොසිතෙනවා නොවේයි. එහෙත් අපට පිළිගන්නට බැරි අධි තාත්වික ලොවක් කරා අප රැගෙන යන්නට වෙහෙසෙන කතුවරයා පාථකයා අතට දෙන්නේ උක් දණ්ඩකි. එය සපන වාරයක් පාසා පැණි රස අඩුවෙනවා සේ මෙයද කියවා යද්දී රසද්දීපනය හීන වී යයි.

මෙලොවෙහි වටිනාම දියරය මව් කිරිය. එයද කිසිදා දරුවෙක් නොවඳපු එහෙත් දරුවන් වඳන්නට උදවු දුන් පොඩිනා නැමැති ගැහැණියට අසීමිතව උරුම වේ. ලොව මවිත කරන රහස් බෙහෙත් තනමින් ඇය මුදල් උපයා ගන්නවා පමණක් නොව බිංදු තනිකරම ජිවත්වන්නේ මව් කිරෙන් පමණි. වෙන යම් අහරක් කිසි විටක ඔහුට නොදෙයි. ඔහුගේ පුරුෂ ලිංගය ස්වාභාවිකත්වය පරයා යමින් විහිළුවක් තරමට පත්වී ඇත. එහි හොඳම සිනා යන තැන නම් පොඩිනා පසුව රහස් බෙහෙතක් තනා පිරිමින්ට එම බෙහෙත අලෙවි කිරිමයි. අද සමාජයේද මෙවැනි චරිත ඇත. තම ලිංගේන්ද්‍රිය ගැන සෑහිමකට පත් නොවු කළ විවිධ වෙද හෙදකම් කරමින් ඒ ගැන සෑහීමකට පත්වෙන්නට වෙර දරණ අවස්ථා නැතුවා නෙවෙයි. වාජීකරණ බෙහෙත් ගැන අදද පුවත්පත් වල ඕනෑ තරම් දැන්වීම් ඇත. එහෙත් මෙතන සිදුවන විහිළුව නම් මෙය මව්කිරෙන් තැනීමය. දොවන්න දොවන්න උණන කිසිදා නොසිදෙන මව්කිරි හරියට මැජික් ඇල්ලක් වැනිය. එක දිගටම කඩා වැටේ. කළයක් දෙකක් නොව ඇතිවෙනතුරු දොවා තැබිය හැක. මේ තරම් දුරට පාඨකයා නූල් බෝලයක මෙන් පටලවා අතරමං කලේ මන්දැයි මට සිතා ගන්නට බැරිය.
එහෙත් මේ සියල්ලන්ගේම ප්‍රධාන අරමුණ මාකටින් විය හැක. අද හොදට විකුණන්නට පුලුවන් දේ ලිංගිත්වය වු නිසා මොහු එය විකිණිමට යොදා ගත්තාදැයි සැක සිතේ. ඕනෑම දෙයක් සාමාන්‍ය ප්‍රමාණයට වඩා වැඩියෙන් ඔසවා තබන්නට ගිය විට එම පුද්ගලයා අසාර්ථක වේ. මොහාන් රාජ් මඩවල නැමැති මේ කතුවරයාද නොගැලපෙන ලෙස ලිංගිකත්වය කරපින්නාගෙන උස්සා තබන්නට යෑමෙන් ඔහු අච්චාරුවක් කර ගත්තා දැයි මට සිතේ.

යථාර්තය ඉක්මවා ගිය රීතියක් ඔස්සේ යමින් මෙය රචනා කරමින් එදා වෙල්ලස්සේ අහිංසක ගැමියන් ගැන වැරදි රූපයක් සමාජය ඉදිරියේ මවා පෙන්වීම දුක්ඛදායක කරුණකි. අනික් දෙය නම් කතාව ආරම්භ වීමට පෙර 1818 කැරැල්ල ගැන කියන තරම් කිසිවක් කතාව තුල නැත. අවසාන හරියේදි යන්තම් කතාවට එය ඔබා ඇත. අසාර්ථක ෆැන්ටසියක සිට විකෘති, සමාජ විරෝධී, පාඨක මනස නිවී සැනසී සන්තෘෂ්ඨියක් ලබනවා වෙනුවට අප්‍රිය වී අප්‍රසාදය වැපිරී කියවු අපරාධය යැයි යන හැගීම ඉපදීම දුකට කරුණකි.

ප්‍රාථමික ලිංගික අරගලයක් ගෙනයමින් අභුත විකාරයක් තුල හිරවූ කර්තෘ තුමා ඔහුගේ ප්‍රථම නවකතාව හොඳම හොඳ මාකටින් න්‍යායක් බව පමණක් සඳහන් කළ යුතුය. එය පොත මුද්‍රණය කළ දින සිට අද වන තුරු ඔහු දක්ෂ ලෙස හසුරුවා ගෙන යන්නට මෙහි ගැබ් කර ඇති දේ මනා ලෙස පිටිවහල් වී ඇත. පාඨකයා සර්ව බලධාරියා කියමින් ඔහු ඇරඹුමේම අත පිස දමා ගන්නේ එබැවිනි.


15 comments:

  1. නියම විචාරයක් ....
    මටත් මේ පොත තාත්වික නැති කතා සිදුවීම් රාශියක් පිරි කතාවක් විදිහට තමා දකින්නේ,, අවසාන හරියේ ඇති ඉංග්‍රීසින් සමහ ඇති සටන මිස වැදගත් කියලා හිතන කිසම සිදුවීමක් නැ. ලිංගිකත්ව හැම තැනකම අනවශ්‍ය ලෙස ඉස්මතු කරලා තියෙනවා..එකත් බොහෝ අතාත්වික ලෙස.. එහි උපරිමය ලෙස මනස තුලින් සිදුවූ ප්‍රේමාලිංගනයක් නිසා ගැබ් ගැනීම දැක්විය හැකි..
    නමුත් එක හුස්මට කියවා අවසන් කල හැකි ෙෙශලයකින් ලියාතියෙනවා ...

    ReplyDelete
    Replies
    1. අනිවා නිමේෂ්. එක හුස්මට කියවා අහවර කිරීමේ ආසාව තියෙනව. ඒ ගලා යෑම හොඳයි මෙහි.

      Delete
  2. පොතේ තියෙන හැම දෙයක්ම සිදුවිය නොහැකී සිද්දී ගොඩක් වුනත් ඒ ලිවීමේ හැකියාව තුල අපිට කියවන්න ආස හිතෙන ගතියක් තියෙනවා.. කොටින්ම කුතුහලයක්.. අවංකවම මට මේක කියවලා දැන ගන්න ඕන උනේ අර කන්‍යාවි කෝමද ගැබ් ගන්නේ කියන එක.. ඒ කුතුහලය රැදවීම අතින් නම් කතුවරයා හුඟක් දක්ෂයි..

    ReplyDelete
    Replies
    1. ඔව් මල්ලි.. ඔයා කියන දේට මං එකඟ වෙනව. ඒක ඇත්ත. කතුවරයා දක්ෂයි ඒ ලෙස.

      Delete
  3. හොද විචාරයක් පොත නොබැලුවද මෙය කියවීමි

    ReplyDelete
  4. අනේ මංද දිනිති අක්කෙ මං මේක කියෙව්ව තමා... ලොවීනත් කියෙව්ව... ඔයා කියන තරං සැරට මට විචාරය කරන්න බැරි වුණත් මේ පොත් දෙකම බලාපොරොත්තු බිදවට්ටවන සුලුයි... අනිත් කාරනේ තමා මට මේ පොතෙන් අර එක දිගට කියවං යන්න පුලු වං කියල හිතෙන දේ හැර ගන්න කියල කිසිම දෙයක් නෑ..
    මායා යතාවාදය කියන්නෙ අද ලෝකෙ පුරාම මුල් බැහැගත් දෙයක්.. මාර්කේස්ගෙ ඉදන් රතු සෝගම් ලියපු මෝ යෑන් දක්වාත් අපේ නවගත්තේගමත් මේ ශෛලිය උපයෝගී කරගෙන තියෙනව . මං ඒ තුංදෙනාම කියවල තියෙනව...
    විශේෂයෙන්ම සයිමන්ගෙ සංසාරණ්‍ය අසබඩ සාපේක්ෂනී වගේ පොත් වුණත් සැබෑලෝකෙන් පරිබාහිර සිදුවීම් අනන්තයි ඒත් මට කවදාවත් ඒව අස්වාභාවික හෝ ආකස්මික විදයට දැනිල නෑ... ඒත් මේ පොත් දෙකම අපිව කලකිරවනව..
    හුගක් අය මොහාන් හොදා කියනව... ඒත් අනේ මංද
    ඒ අයම සර්පයට පහර ගහනව... කේ කේ හොදයි මීට වඩා... මොකද නවගත්තේගම වගෙම සර්පයටත් තමන්ට හුරු ශෛලි්‍යක් තියන... ඒත් මොහාන් එතවනදි අතර මං...
    කව්ර් මොනා කීවත් කේ කේගෙ සර්පයෙකු හා සටන් වැද එතකොට නවගත්තේගම වගේ කියෙව්ව නං මේ පොත ඉබේම ප්‍රලාප වෙනව..

    ReplyDelete
    Replies
    1. මං ලොවීනා අරන් ගෙදර තියල ආව මල්ලි. ඒත් දැන් හිතෙනව ලොවීනත් මේ වගේ වෙන්න ඇති කියල. මේ කතුවරයා හැම එකම පටලවගෙන කොහේදෝ ලෝකෙක අතරමං වෙලාද මන්දා..

      Delete
  5. ඉතාමත් හොඳ විචාරයක්... මම මේ පොත තවම කියවලා නැහැ. කොහොම වුණත් ලංගිකත්වය නිර්මාණයෙන් ඔබ්බට ගිහින් ඉලිප්පී පේනවනම් ඒක බලෙන් ඔබාපු කෘතියක්

    ReplyDelete
    Replies
    1. පොත කියවන්න හැකි ලෙස ගලාගෙන යෑම හොඳයි අයියෙ.. ඒත් අපරාධෙ කාලය. අවංකවම අනවශ්‍ය ලෙස විවිධ ලෙස ලිංගිකත්වය ගොතා ඇති නිසා මේ කෘතිය අස්වභාවිකයි මට.

      Delete
  6. අනේ මන්දා අක්කේ.. මමත් පිටු දෙකක් කියවල අත්හැරිය පොත. මට නම් එච්චර ඇල්ලුවේ නෑ...

    ReplyDelete
    Replies
    1. හෙ හෙ..එහෙනම් මල්ලි කලින්ම තේරුම් අරගෙන...

      Delete
  7. බොද්ලිමා වැනි කාතියක් කළ අපේ කාලයේ හිටි අපූර්ම නිර්මාණශීලි ලේඛකයෙක් හැටියට මොහාන් හදුන්වන්න පුළුවන්
    ඒ.් පසුකාලයක ඔහු හිටියෙ පෞද්ගලික විද්‍යුත් මාධ්‍ය ආයතන වල ලොකු පුටු වල.ඒ මොහාන් සහ බෝදිලිමා ලියූ මොහාන්ගේ පරස්පරය කාලෙකට පස්සෙ ඔහු ලේඛණ කලාවට එද්දි දැනෙන්න ඇති කියලා විශ්වාස කරනවා.ඔහුට මාධය ආයතන ප්‍රධානියෙක් හැටියට කරන්න වෙච්චි දේවල් ව සහ ආරක්ෂා කරන්න කැප කරපු දේවල් වල බෝදිලිමා ලියපු මනුස්සය හිටියෙ නැහැ.තවමත් ඔහු බෝදිලිමා හොයන ගමන් ඇත්තේ

    ReplyDelete
    Replies
    1. අවංකවම බෝදිලිමා හුගාක් හොඳ නිර්මාණාත්මක කෘතියක්. ඔහු ඒ සාර්ථකත්වය මෙතනදි මරා දාලා.

      Delete
  8. සමහරු තමන්ගේ විකෘති ලිංගික ආසාවන් සන්තර්පණය කරගන්නේ මෙවන් පොත් ලිවීමෙන්. අධියථාර්තය මතු කරන බොහෝ ලාංකික සිනමාකරුවන්, ලේඛකයන්, අපි අතීතයෙත්/අදත් sex-starved ජාතියක් වශයෙන් ජීවත් වූවාය/වන්නේය යි ලෝකයට පෙන්නන්නේ ඇයිද මන්දා?

    ReplyDelete

ඔබේ පැමිණිම මට සවියක්.

ඉතින් සොඳුර

 ඉතින් සොඳුර , ජීවිතේ කොයි හැඩේදැයි නොවිමසන්න, ඔබ ගිය තැන සිට මා  දරාගත්තේ කෙසේ දැයි නොඅසන්න  ආදරයක අකුරු අතරට වැඩි යමක් ඔබේ ඇසුරෙහි මා විඳි...