Saturday, January 31, 2015

උදුරාගත් අයිතිය

දුනු හී සම වදන් නැතිවම
කුමරුන් සමඟ සරණව යනෙන විට
අතර මඟ පර්වත මුදුනකින්
පෙරලූ පව බර ද කරුමයට


ඵල බර වනස්පති පිරි ලැහැබෙ
සැලමුතු පෙම තිබුණි හද මඩලෙ
ගඟ දිය මත පිපුණු කොඳ කමලෙ
පිනි බිදු සැලුණෙ කිම හිමිදිරියෙ


තුනු සිහිනිගිටි සොඳුරු සියොළඟ
හුනු වී ගලන ස්නේහය අපමණ
කුණු වී ගඳ ගහන මඩ ගොහොර
හමු වී සිප ගත්තෙ කිම විගස


රන් රිදී නෙක වෛවර්ණ
යයි සැලී ගහ කොළද ඈ සමඟ
මං මුලා වැල් ඇතිරු ගමනක
උන් සොරාගත්තා ඇගෙ සිහින


Saturday, January 24, 2015

මගෙ දුවේ..

ඉෂ්ඨවෙන්නැති සිහින සඟවන්
ගලා යන ගඟක් ළඟ නැවතුනොත්
මගේ හදවත පතුළෙ ඇත
වරක් හෝ බලපන් දුවේ


සින්න කරගත් මේ ජීවිතේ
බලා හිටි තැනක් නුඹ දැක්කොතින්
ඒ නුඹේ ඇස් දෙකයි
සත්තමයි මගෙ දුවේ


කැඳැල්ලක් නැති කිරිල්ලියො
ආකහේ යට පැටවු රකිනව
නොදැක්කා නම් නුඹ
මගේ වත බලපන් දුවේ


වියරණ කිසිත් සම නැති
නිමාවක සළකුණක් පේන්නැති
තාලයක් නැතිවම ගයන
ගීතයක් මං මගෙ දුවේ


කාලයට ඉඩ දී බලා හිටපන්
පාපයට දඬුවම් එපා කියපන්
සාපයට කිසි දිනක නොගොසින්
හීනියට ජීවිතේ නුඹ වියාපන්.

Saturday, January 10, 2015

මගේ අක්කා

මහා වැස්සක හබරල පත්‍රයක් ගෙන
මගේ හිස මත දිය බිංදු පන්නා
වහා ඇවිලෙන කුස ගින්න මතදී
නුඹ අතේ බත් පිඩක් තිබුණා

රාත්‍රියකදි තරු එළිය අරගෙන
වරෙන් කියමින් අත්ලතින් ඇද්දා
කාත් කවුරුත් නැති දිහාවක
මගේ කියමින් බදා ගත්තා

කෝටියක් දේ ගැන කියන්නට
බෝම අසමත් වුනත් දිවියේ
කාසියක් නැති ජීවිතය අස්සේ
මගේ අක්කා ළඟින් රැදුණා