සැරිසැරූ හැම තැනම මේතාක්
සෙවූ කිසිවක් හමුනොවුණි
ඉඳින් මා ප්‍රිය හිතවතුනි,
තැනිතලා තෙත් බිම් දියවී හමාරය
ලියූ ගී එකින් එක ලෙහූ විට
හුස්මකින් අහුර ගානේ එතී ඇත
දසැ'ගිලි මතින් රූටා වැක්කෙරන
නමක් නැති පැතුමන් බිදී ඇත
වැහිකෝඩ සුළි සුලං කලුවරට
වෙව්ල වෙව්ලා පෑරෙන ජීවිතයකි
පාවෙලා ගලාගෙනවත් නොයන
ඇහිදාර අඟිස්සක උණුදිය බුබුළුය
චරිතාංග නළු නිළි වරප්‍රසාද අහිමි
මෙගා ටෙලියක අතුරු චරිතයකි
බිම වැටී පෑගෙන්න කියූ විට
සියළු රංඟනයන් නතරවී ඇත
උක්ත ආඛ්‍යාත සමබර නොවන
රචනාවක කොමාවක් තිතත් නොවුණි
අක්ෂර වින්‍යාසය පැටලිච්ච ලියවිලි
වැහි දියෙන් දියබත්ව දියවී ගොස්ය
හිතාදර මිනිසුනි
ඔබ කොහෙද කොතැනකද කා සමඟද
අතුරු ප්‍රශ්නාවලී නොනගනතාක්
බොහෝ සුන්දර ගීතාවලි නොනැවතී
සබඳකම් ඉතා මිහිරිව ගලායයි
සුවෙන් සතුටින් කෙලවර ලියායන්නට
ඔබලා ඉන්න තැනකම ඉන්න
හුස්ම වැටේදැයි විමසා බලන්නට
තනිව මා තබා වෙනතකට යන්න
❤❤❤❤❤
